الخشوع فى الصلاه [الأرشيف] - المحاسبين العرب

NADA

2007-04-10, 05:46 PM

الخشوع فى الصلاة
----------------------------

بسم الله الرحمن الرحيم
ايه رايكوا نصلى بجد
عايزين نرجع لمفهوم الصلاة الاصلى
وهو انها صلة بين العبد وربه
وليست مجرد تاديه حركات وترديد كلمات
-----------------------------------------
يلا نبدا
اول حاجة هتروح تتوضى انت عارف ان من توضا خرجت خطاياه
يعنى وانت بتتمضمض اى حاجة غلط قولتها هتخرج
و انت بتغسل وشك كل حاجة عنيك بصت عليها تتشال ذنبها
وهكذا حتى تخرج كل خطاياك

ان شاء الله

وبعد الوضوء لو اتشاهدت تفتح لك ابواب الجنة
ال8 تدخل من ماتشاء
انت متخيل....................!0

و اوعى تنسى تسمى قبل الوضوء

---------------------------------
بعدين هنروح للصلاة

هتستقبل القبلة اوعى تقف بجسمك و قلبك متوجه لشىء تانى

تانى حاجة استغفر ربنا علشان متقبلهوش و انت عامل حاجة غلط

انوى و ابتدى

هتقول الله اكبر

حاسس بيها

الله اكبر يعنى ربنا اغلى شىء عندى و هو اكبر شىء و اعظم شىء يعنى مينفعش افكر فى حاجة تانيه و انا واقف اكلمه

وهتكررها كتير فى الصلاة علشان كل ما تنسى و تسرح تفتكر و تقول لا ربنا اكبر

هتقرا بقى الفاتحه

ربنا قال انه قسم الصلاه بينه و بين عبده كالاتى

انت تقول الحمد لله رب العالمين

يرد ربنا سبحانه و تعالى و يقول حمدنى عبدى

تقول الرحمن الرحيم

يقول اثنى على عبدى

تقول مالك يوم الدين

يقول مجدنى عبدى

تقول اياك نعبد و اياك نستعين

يقول هذا بينى و بين عبدى و لعبدى ما سال

اسال براحتك بقى و قول لربنا اهدنا الصراط المستقيم صراط اللذين انعمت عليهم غير المغضوب عليهم و لا الضالين

فيرد عليك يقولك هذا لعبدى

انت متخيل قد ايه جمييييييييييل ان ربنا يرد عليك

ربنا الى خلق الكون دة كله ربنا العظيم بيرد علينا احنابالردود الجميلة دى

بعد كدة هتقرا ما تيسر لك من القران حاول تقوله بقلبك قبل ما ينطق لسانك حاول انك تقرا تفسيرو اعرف وحس بالايات

بعد كدة كبر و اركع

اركع بقلبك و اخشع لربك العظيم و قول سبحان ربى العظيم و كررها 3 مرات علشان لو مرة محستش بيهاتحس بيها فى التانية و التالته

قوم واحمد ربك على نعمه الكتيرة و اولها نعمة الى انت بتعمله دلوقتى انك بتكلمه هو عز وجل

بعدين كبر و انزل اسجد وذى ما اتفقنا السجود بالقلب اولا ذى الركوع

وقول سبحان ربى الاعلى

وحس اد ايه هو فعلا الاعلى و كررها تلاتة

و ادعي براحتك انت دلوقتى اقرب ما تكون من ربنا

كلمه و قوله عالى فى قلبك مش لازم تتكلم باللغة الفصحى اتكلم وقول الى انت عايزة المهم يكون من قلبك

ووالله مش هتلاقى راحه ذى اللى هتحسها لما تشكى لربك كل همومك
انت لما بتحكى للناس مشاكلك (اه ده لازم نعمله عادى ) بس مين اللى بايده كل شىء

مين القادر على كل شىء
مين اللى هيحققلك اللى بتتمناه
مفيش مفيش دعوة بتقولها الا و يجيلك منها الخير
يا اما ربنا هيستجيبلك
او هيصدلك بدلها شر كان هيجيلك
او يجازيك بيها يوم القيامه

يعنى لازم لازم هتاخد حاجة و كلهم احلى من بعض

ادعولى دلوقتى بقى

نكمل

قوم كبر و اقعد بعدين هتنزل تانى تسجد

انت بتسجد مرتين لان السجود اهم اركان الصلاة

لانك فيه بتكون خاضع تماما لله

بتحط اكرم ما عندك وهو وجهك على الارض

الارض الى انت بتمشى عليها وتدوس برجلك

بتعمل كدة علشان ربنا بس انت دلوقتى خاضع ليه تماما بكل جسمك وقلبك وعقلك انت بتعمل كدة علشان هو ربك الذى خلقك و رزقك و اكرمك فلا تزل نفسك لاحد سواه
اوعى تعمل حاجة مترضيش ربنا عشان اى حد

و لو سجدت بجد و اعدت تكلم ربنا هتحس باجمل شعور ممكن تشعره فى الدنيا دى

بعد كدة هتقوم من السجود

--طبعا تعمل الركعات حسب الصلاه الى بتصليها--

هتقول التشهد

فى الاول طبعا بنقول ان التحيات لله و الصلوات و الطيبات فكل شىء هو لله

بعدين سلم على نبيك حبيبك

و اوعى تمشى بسرعة حاول تسمعه و هو بيرد عليك السلام رده بيكون جميل اوى واسالوا مجرب

بعدين سلم على نفسك و على المؤمنبن

وبعدين صلى على النبى عليه الصلاة و السلام و ادعى

وبعدين هنخرج من الصلاة بقى

سلم على ملك اليمين

هو دلوقتى عمال يسجلك فى حسنات

و سلم على ملك الشمال

هو دلوقتى عمال يشيلك فى سيئات

وبعد ماخلصت و سلمت عليهم

قول اللهم انت السلام و منك السلام تباركت يا ربنا يا ذا الجلال و الاكرام

اوعى تنساها علشان هتقولها فى الجنة باذن الله لما يلقى عليك ربك السلام
يااااااااااااه متخيل

واستغفر ربنا 3 مرات

و اسئله ان يعينك على ذكره و شكره و حسن عبادته

علشان دايما تصلى بالحلاوة دى

ان شاء الله

ويا ريت تقرا اية الكرسى لان من قراها بعد كل صلاة دخل الجنة

و ياسلام لو ختمت الصلاة بقى ب 33 مرة

سبحان الله
و الحمد لله
و الله اكبر
و ربنا يكرمنا و يهدينا جميعا

معلش عالتطويييييييييييييييييل

ملحوظه
تم كتابه هذا تاثرا بدرس الخشوع فى الصلاة للاستاذ عمرو خالد

و المهم فى الاخر
عرفت ليه الرسول كان بيقول ان الصلاة جعلت قرة عينه

اتمنى يكون وصل المعنى الجميل دة
والسلام عليكم و رحمة الله و بركاته

abdelhamied

2007-04-11, 11:32 PM

بارك الله فيكى اخت nada
بصراحة لا أجد الكلمات التى أرد بها على هذا الموضوع
ولكن أحب أن أشير إلى أن قبل كل ما ذكرتيه لابد
قبل أن يتوضأ أن يضع المرء فى نفسه أنه يتهيأ للقاء الله
الله العظيم القوى الجبار القادر الغفور الرحيم الرزاق الوهاب
.........فلو وضع الانسان فى نفسه أنه يتهيأ للقاء مالك الملك
فلا بد أن يخشع
ومن التهيؤأن يأخذ المرء أفضل زينته لقوله تعالى "يأيها الذين آمنوا خذوا زينتكم عند كل مسجد " أى عند كل صلاة ، نعم لا بد أن يرى الله علينا أثر نعمته عندما نتهيأ للقاه

ثم لا بد أن نحاول فى صلاتنا أن نصل لدرجة الإحسان ؟ أتدرون ما الإحسان " أن تعبد الله كأنك تراه ، فإن لم تكن تراه فإنه يراك " نعم لا بد أن تتخيل أنك واقف أمام ملك الملوك يااااااااااااااااااااااااااااه تخيل أنك تراه ، ولكن إذا لم نستطع أن نصل لدرجة أن نتخيل أننا نرى الله فلنوقن بأنه يرانا يراقبنا ويسمعنا ، تخيل أن الله ينظر إلى أفعالك فكيف تحب أن يراك الله ؟

الموضوع كبييييييييييييييييييييييير مش سهل ولكنه يحتاج أن يتم تطهير القلب مما شابه من مشاغل الدنيا فلا يجتمع حب الله وحب الدنيا فى قلب المرء

أشكر لك أخت nada مرة أخرى تناولك هذا الموضوع

وتقبلى خالص تحياتى