يوميات مأمور ضرائب أسمة"مأمور"

[m.sharkawy]

يوميات مأمور ضرائب
نسعرض هنا لاعضاء شبكة المحاسبين العرب بعض التساؤلات التي تعرض لها الاستاذ "مأمور" الموظف بمصلحة الضرائب المصرية

اليوم الاول :
دردشة في المقهى الضريبي حول بعض أحكام قانون الضريبة على الدخل 91 لسنة 2005
والذي يسكن في شارع يحتل ناصيته أحد المقاهي الشهيرة والتي يرتادها الكثير من مختلف الفئات والطبقات وقد ذاع صيت تلك المقهى وسميت بقهى الضرائب .

لا أعرف بالظبط ما السبب وراء هذه التسميه وقد يكون لقربها من مصلحة الضرائب وربما بسبب أن كثيرا من موظفي المصلحة يرتاد القهوة وهو طعبا واحد منهم وذلك طبعا بعد الانتهاء من عمل يوم تكثر فيه المناقشات والمحاورات مع المترددين على المصلحة وقد يكون السبب كما يمزح

رئيسيه في العمل بأن نوعية المترددين على المقهى تتفق مع تقسيم القانون الضريبي للفئات الخاضعه للضريبة حيث تجد الطبيب والمحامي والمحاسب والتاجر واصحاب العقارات واصحاب الشركات الكبرى.
طبعا تصنيف يتفق وأهواء موظفي المصلحة "الوظييفه تحكم " ألم
اقل لكم أنه يعمل في مصلحة الضرائب...!
وقد يكون لهذا السبب أن أصبح المأمور "مأمور" هدفا يوميا للكثير من الاستفسارات وتساؤلات المترددين على المقهى وذلك على سبيل الدردشة والتي تبدأ عادة بالسؤال عن الصحة والاولاد وطلب الشاي ومفيش مانع من ال.... وها قد بدأ أحد الجالسين بجواره موجها الحديث
له :
هو صحيح يا باشا مصلحة الضرائب عملت قانون جديد ..؟
رد أخونا "مأمور"قائلا : فعلا ده حصل
- على الله ما يكونش زي كل القوانين اللي قبلة بتاعة "علاء الدين "
- ومالها يا سيدي القوانين اللي قبله وايه حكاية "علاء الدين"؟
بصراحة يا باشا احنا عشان نفك طلاسم مواد القانون كان لازم نستحضر خادم الفانوس السحري المحبوس في مصباح "علاء الدين" عشان يفضل يفهم فينا وبرضه مش فاهمين.
- مأمور لم يتمالك نفسه من الضحك لدرجة أن الكثير من الذين كانوا يشاركوه الحديث أخذتهم نوبة من الضحك لدرجة أن البعض قد وقع من على مقعده وهو يصدق ويؤمن على كلام الرجل ... واستطرد الرجل متسائلا :
=هو كل واحد لازم يدفع ضرائب ؟
- البلد بتوفر للمقيمين بها وللمنشآت الكائنة فيها الامن والعلاج والتعليم و... و... وعشان كده لازم الناس لما تشتغل وتحقق أرباح لازم تدفع جزء ولو بسيط من الارباح تمول به مشروعات الدولة وعشان كده احنا بنقول على الشخص اللي بيدفع الضرائب أو المفروض أنه

يدفعها بأنه "ممول" والممول ده إما يكون شخص طبيعي أو شخص اعتباري ودول يعني :
واندهش الرجل لكلام "مأمور" ولم يتركه يكمل وبادره قائلا :
احنا هنرجع تاني لحكاية "علاء الدين " ؟
- "مأمور": مش فاهم ؟
- ايه حكاية شخص طبيعي دي أو شخص اعتباري ؟
ممول وعرفناها لكن ايه بقى معنى الكلام الثاني ده ؟
-مأمور: يا سيدي الفاضل الشخص الطبيعي ده يعني :
أنا وانت أو أي ممول بصفتة الشخصية ، الموظف مثلا شخص طبيعي، الطبيب شخص طبيعي ، المحامي ، وطبعا الــمــحــاســــــب ، ومالك العقارات شخص طبيعي وصاحب المشروع الفردي سواء كان تجاري او صناعي برضه شخص طبيعي ، لكن...
= آه !! أنا لا اخاف إلا من ولكن دي !!
- انا قصدي اقولك لكن غير كده يبقى شخص اعتباري زي شركات الاموال وشركات الاشخاص وشركة الواقع أو جمعية تعاونية أو هيئة عامة او بنك او منشأة او شركة اجنبية او حده من وحدات الادارة المحلية .
= من اول جمعية تعاونية لحد آخر كلامك انا فاهمه كويس كل يوم بنقرأ عنه في الجرائد لكن ايه يعني المقصود بشركات الاموال والاشخاص والواقع ؟؟

والى لقاء في مساء الغد من دردشة جديدة حول أحكام قانون الضريبة على الدخل رقم 91 لسنة 2005 في "يوميات مأمور ضرائب"

[المارد]

فكرة جميلة

بس مين إلى هيكون جالس مع المأمور على القهوة
المرة الجاية؟؟

[abdelhamied]

تسلم يا ماستر

موضوع جميل وبيبسط القانون بأسلوب شيق وفكاهى

منتظرين باقى اليوميات للتعرف على باقى الممولين

تحياااااتى

[soha]

[http://www.21za.com/pic/welcome001_files/7.gif

مشكور ماستر علي هذه الخاطرة الجيده و الاسلوب الشيق
ونرجز المزيد من التفاصيل

[m.sharkawy]

اشكر كل من شارك بالرد في هذا الموضوع
- المارد
- abdelhamied
- soha

واليوم بإذن الله تعالى سنكمل حديثنا "يوميات مأمور "

رد الاستاذ " مأمور " :
شوف يا سيدي شركة الاموال دي ممكن تكون شركة مساهمة أو شركة توصية بالأسهم أو شركة ذات مسئولية محدودة.
= وايه الفرق بينهم ؟؟
-الشركة المساهمة دي يا سيدي رأسمالها مقسم الى أسهم قيمتها متساوية وتكون مسئولية كل شريك في الشركة (في حدود ) مساهمته في رأس المال
يعني اللي عنده 100 سهم قيمتهم مثلا 1000 جنيه غير اللي عنده 200 سهم قيمتهم 2000 جنيه واسم الشركه مايكونش على اسم أي حد من الشركاء.
= طيب والشركة الثانية دي اللي انت قلت عليها معناها ايه ؟
- قصدك شركة التوصيه بالأسهم .
= أيوه هي دي
- دي شركة يا سيدي فيها نوعين من الشركاء نوع منهم بنسميه شركاء متضامنون مسئوليتهم تضامنيه عن ديون الشركه وغير محدوده والنوع الثاني شركاء
مساهمين ومسئوليتهم عن ديون الشركه (في حدود قيمة ) الاسهم بتاعتهم
= النوع الثاني كمان فهمناه طيب ايه المقصود بالشركه اللي مسئوليتها محدودة وشركة الواقع ؟
- الشركة يا سيدي ذات المسئولية المحدوده لايزيد عدد الشركاء فيها عن خمسين شريكا فقط وكل واحد مسئول فقط على قد حصتة (ألم اقل لك انها مسئوليه محدوده ) لكن خلي بالك الشركة دي غير الشركات المساهمة يعني ماتقدرش تزود رأس مالها أو تستلف فلوس لها عن طريق الاكتتاب العام
= يعني تقصد دي شركات عائلية بيعملوا كل حاجه لنفسهم وبنفسهم من غير مشاركة حد خارج الشركة
- ممكن تقول كده أما شركة الواقع بقي فهي تقوم بين اشخاص طبيعيين لمزاولة نشاط وعملوا عقد للشركة لكن لم يستوفى العقد اجراءات الإشهار وممكن كمان الشركه تقوم بين الاشخاص من غير ما يكون فيه عقد زي النشاط اللي بيتم بين مجموعه اشخاص ومعتمدين في كده على عقد ايجار باسم الشركاء المهم يا سيدي سواء كان فيه عقد او ما فيش ..المهم
فيه نيه بينهم لعمل شركةومزاولة نشاط لكن الحاجة الغريبة بقى ان ممكن يبقى فيه شركة واقع من غير ما تبقى فيه نيه لانشائها!!!
= أنا قلت من الاول لازم نحضر العفريت بتاع الفانوس عشان يفك الألغاز !!
-ولا عفريت ولا حاجه الموضوع ببساطه اذا ورثت يبقى مافيش نيه اساسا لانشاء شركة والشركة في الحالة دي جاءت لك ولم تسعى لانشائها ..
واضح كده ؟ لكن خلي بالك لازم تفرق بين شركة الواقع الناتجة عن ميراث منشأة فرديه ..في الحالة دي بالطبع الوارث هيبقى شخص طبيعي مش اعتباري وحصته تخضع للضريبة اللي تخص الاشخاص الطبيعيين لكن اذا كانت ناتجة عن وفاة احد الشركاء في شركات الاشخاص في الحالة دي لا تخضع حصة الوارث للضريبة على ارباح الاشخاص الاعتبارية لان الشركة اساسا خاضعه للضريبة على ارباح الاشخاص الاعتبارية
= على فكرة يا باشا سيادتكم نسيت تقول لنا وتشرح لنا المقصود بشركات الاشخاص .
- يا سيدي الفاضل شركات الاشخاص دي اما تكون شركات تضامن او شركات توصية بسيطه ومن غير ما تقول ايه الفرق وتبدو علامات الدهشه على جهك ونرجع لموضوع العفريت ...هقولك انا
شركة التضامن دي : بتقوم بين اثنين او اكثر بقصد الاتجار او التصنيع وبنعتبر الشريك في شركة التضامن تاجر بمجرد دخوله فيها وعلى فكرة الشركاء مسئولين مسئوليه تضامنيه مع بعضهم عن ديون الشركة
اما شركة التوصية البسيطه : يا راجل يا طيب فيها نوعين من الشركاء
النوع الاول : متضامنين ومسئولين مسئوليه تضامنيه عن ديون الشركة
النوع الثاني : مسئولين على قد حصتهم في الشركة ودول اسمهم شركاء موصين

أحس "مأمور" بعد ذلك أن الساده الذين شاركوه في الدردشه قد استراحوا وبدأت علامات
السعادة تعلو الوجوه فالموضوع لن يحتاج الى تحضير عفريت الفانوس السحري لفك الطلاسم وهم بالانصراف واذا بأحد الحاضرين يقسم عليه بأن يتناول الشاي مره اخرى ولم يترك له فرصة الرفض حيث بادره بسؤال غريب
سنكمله في المره القادمه ان شاء الله

[zifagoo]

موضوع رائع و طريقة ذكية لتفسير قانون الضرائب
و لكن لي استفسار هل يمكن لاي من الاعضاء اي يضيفوا لهذا الموضوع

[m.sharkawy]

اولا ارحب بأخي الغالي والعضو النشيط جدا اكرمه الله وبارك له في عمره
الاستاذ / zifagoo
ثانيا : اي موضوع بالمنتدى تقريبا مفتوح للمشاركه
فما للمنتديات هدف اسمى من التفاعل بين الاعضاء والاحتكاك العلمي والمهني من خلال تلك المشاركات التي نضعها في موضوعاتنا
وسعدني ان تكون من المشاركين بالاضافه الى هذا الموضوع أو غيره من الموضوعات
ولكل الاعضاء الحق في ذلك
وشكرا

[m.sharkawy]

احد الجالسين سأل الاستاذ "مأمور"
= من حق يا باشا هو الخواجه اللي بيشتغل في مصر وفاتح ورشة مثلا زي الخواجة اللي في آخر الشارع ده برضه بيدفع ضرائب ؟
- رد مأمور
انا عايز اسألك انا عن الخواجه ده هوه بيملك المشروع بتاعه لوحده ولا معاه حد ؟
=هي تفرق يا باشا ؟
- طبعا تفرق
لوحده يبقى شخص طبيعي
معاه حد يبقى شخص اعتباري
وكل حاجه لها شروط عشان نعتبره ممول مقيم ويخضع للضريبة
يعني الشخص الطبيعي (يعني الخواجه لو كان المشروع بتاعه لوحده ) نعتبره مقيم في مصر اذا كان له موطن دائم في مصر ، بمعنى انه يتواجد في مصر معظم اوقات السنه سواء في مكان مملوك له أو مكان مؤجر او له محل تجاري او مكتب او عياده او مصنع او اي مكان يمارس فيه النشاط بتاعه .
واذا كان عمك الخواجه ده بيسافر ويرجع لكن بيقعد في مصر فتره تزيد عن 183 يوما على بعض يعني متصله أو حتى متقطعه لكن في ظرف 12 شهر كامله ، في الحاله دي بنعتبره ايضا مقيما في مصر ويخضع للضريبة في مصر عما يحققه من ارباح داخل مصر.
وكمان المصريين اللي بيشتغلوا بره مصر ولكن بياخدو رواتبهم من الخزانه المصريه سواء كانت حكوميه او خاصة بنعتبرهم مقيمين في مصر ويخضعوا للضريبة في مصر. أي ان الممول المقيم في مصر أو غير المقيم فيها يخضع للضريبة فقط عن الارباح المحققه في مصر.
= طيب يا باشا لو كان الخواجه ده معاه حد في الشركه
يعني شخص اعتباري ،مش كده صح برضه !!
- فعلا الشخص الاعتباري يا سيدي الفاضل بنعتبره مقيم في مصر لو تم تأسيس الشركه وفقا للقانون المصري او اذا كان المركز الرئيسي او الفعلي للاداره في مصر او اذا كانت الدوله أو اي شخص اعتباري عام يملك في الشركه اكثر من نصف رأسمالها.

[m.sharkawy]

أي حد من الاعضاء لديه اي استفسار أو سؤال
حول أحكام قانون الضريبة على الدخل رقم 91 لسنة 2005
لا يتردد في الكتابه في هذا الموضوع وطرح سؤاله او استفساره مباشرة

[haitham7]

http://i11.tinypic.com/2zhf5te.gif

شكرا على الاسلوب الرائع فى العرض والشيق فى الحوار بين الماور و الممول واتمنى ان تستكمل هذة السلسلة من اليوميات

http://i14.tinypic.com/33nhzq8.gif

[m.sharkawy]

اولا اتوجه بالشكر لكل من شارك في هذه الدردشة سواء بالاستفسار أو التوضيح
واشكر الاستاذ / haitham7 على رده ومشاركتة الطيبه
http://www.al-wed.com/pic-vb/2.gif
أحد الجالسين قام مسرعا بقول :
= طيب يا باشا ايه المدة اللي بنحسب على اساسها الضريبة ؟
يعني واحد اشتغل شهر وقفل زي واحد اشتغل سنه مثلا ؟
رد استاذ "مأمور" قائلا :
- شوف يا سيدي الفاضل الضريبة بتتفرض على صافي الدخل خلال فترة سنة يعني الايراد اللي داخل لك نشيل منه كل المصروفات اللي صرفتها عشان تحقق الايراد ده ونشيل منه كمان مبلغ عشان ظروف معيشتك واللي يفضل ده هوه صافي الدخل اللي تحقق خلال السنة واللي تبدأ من أول يناير من كل سنة وتنتهي في آخر ديسمبر لكن فيه حالات بنحسب الضريبة فيها عن مدة أقل أو اكبر من سنه (12 شهر يعني ) لكن على العموم اذا زاول الشخص نشاطة خلال فترة محدودة يتحاسب عن أرباحة خلال هذه الفترة بشروط محددة .
= وهنا تساءل كثير من الجالسين :
ماهي الحالات التي تقل او تزيد عن 12 شهر ؟
- شوفوا يا سادة فيه حالات يمكن نحسب فيها الضريبة عن فترة اقل من 12 شهر زي مثلا الفترة المالية الاولى للممول حيث انه ليس من الضروري ان السنه الاولى للنشاط تتفق مع السنة الضريبية
كما لو توفى الممول او توقف عن مزاولة النشاط او تنازل عن المنشاة لحد تاني قبل نهاية السنه المالية له ،
وحالة كمان لو ان الممول مش ماسك حسابات منتظمة وبعدين ابتدا يمسك حسابات منتظمة خلال السنة في الحالة دي كمان بنحسب الضريبة عن كل فترة مستقلة عن بعضها أو الممول عدل نهاية السنة المالية بتاعتة فاذا كان الممول مثلا تنتهي السنه المالية بتاعته دائما في اخر يونيو من كل عام (30/6) وبعدين قرر ان يعدل ويخليها اخر ديسمبر من كل عام في الحالة دي نحسب الضريبة على نصف سنه من 1/7 حتى 31/12.
=قام احد الجالسين في الركن البعيد من المقهى قائلا :
طب وايه الحالات التي نحسب فيها الضريبة عن فترة اكثر من سنة ؟؟
- لو الممول عدل نهاية السنة المالية بتاعتة وترتب على ذلك زيادة لا تتجاوز ثلاثة اشهر تدخل فترة الثلاث شهور دي ضمن الفترة الضريبية الاولى .
= رد الجميع قائلين :
بصراحة مش فاهمين يا ريت حضرتك تقول لنا مثال عشان نفهم .
- رد "مأمور" وقد بدا على وجهه علامات التعب :
نفترض ان فيه صاحب مشروع حساباته وميزانيته بيعملها على 12 شهر واختار ان السنه المالية بتاعتة تنتهي دائما في 13/10 من كل عام وبعدين قرر في 1/12/2006 ان يعدل وتنتهي في 31/12 من كل عام في الحالة دي نحسب الضريبة عن الفترة من 1/11/2005 حتى 31/12/2006 يعني فيه شهرين في سنة 2006 وهما شهري 11 و 12 تم ضمهم للفترة المالية بتاعة الممول اللي كان مفروض تنتهي في 31/10/2006م.
= طيب الكلام ده بيطبق ايضا على الاشخاص الاعتبارية ؟
- فعلا بيطبق ولكن يزيد عليه فيما يخص اول سنة مالية للشركة ان يكون الكلام ده منصوص عليه في النظام الاساسي للشركة أو عقد الشركة .
وهنا احس "مأمور" ان الوقت قد حان للانصراف بعد كل هذه التساؤلات الكثيرة وبالرغم من ان عمال المقهى بدأوا في ترتيب بعض الكراسي الخالية الا ان "مأمور" رأى في العيون كثيرا من الاستفسارات ولكن برودة الليل التي بدأت تهاجم المكان بشدة وشعوره بالاجهاد كانا اقوى كثرا من الاستمرار في النقاش والدردشة .
http://www.al-wed.com/pic-vb/2.gif
والى لقاء في مساء يوم آخر من دردشة جديدة حول أحكام قانون الضريبة على الدخل رقم 91لسنة2005م.
لكم مني تحية ولنا لقاء

[mekawy]

بسم الله الرحمن الرحيم

طريقه ممتازة فى العرض تشجع كل الاعضاء للإهتمام
بالقانون الجديد 91 لسنه 2005

[ahmed22]

اسلوب جيد وشيق بارك الله فيكم --فعلا الناس تحتاج شرح مبسط وليس كما نشاهده من اعلانات عن القانون وكأنك تخاطب ناس سذج -

[وهب الله]

السلام عليكم

والله اعجبتني الفكرة الله ينور عليك ويزيدك من علمه